Frá og með 1.september 2019 má ekki afhenda neina burðarpoka án þess að viðskiptavinur greiði fyrir þá.  Það skiptir engu máli úr hverju pokinn er gerður.  Þetta á bæði við um burðarpoka sem eru á afgreiðslukassa og inn í búð. 

Skv. þessu þá þarf að innheimta gjald líka fyrir poka sem eru inn í verslunum, þar sem vörur eru í lausu (grænmeti, nammi, skrúfur, o.s.frv.).  Að vísu má færa rök fyrir því að rukkað sé fyrir pokann með því að vigta hann með vörunum, en það er ekki nóg því þetta þarf að vera sundurliðað á kassakvittun.

Hin leiðin er náttúrlega að hætta að selja í lausu og pakka öllu í poka.  Það er ekkert sem bannar það og má jafnvel vera plastpoki.  En það er nú kannski ekki voðalega umhverfisvænt.

Kannski verða þessar lagabreytingar til þess að viðskiptavinir fari að mæta meira með poka í verslanir sem hlýtur að vera gott og eykur tilfinningu kaupanda á umhverfisvernd.

Það má segja að plastpokabannið sem tekur gildi 1.janúar 2021 sé í raun framhald af reglugerðinni sem tók gildi 1.september 2019.  Það þarf áfram að innheimta gjald fyrir poka sem viðskiptavinur fær í verslun, en frá og með 1.janúar 2021 má það alls ekki vera plastpoki.  Það má vera úr öllum öðrum efnum en plasti, t.d. pappír, maís eða öðrum lífbrjótanlegum efnum.

Hins vegar má áfram selja plastpoka í verslunum.  Það mætti því t.d. pakka 5 burðarpokum saman í pakka og selja eins og hverja aðra vöru í hillu verslunar.  Kaupandi getur þá væntanlega opnað umbúðirnar og notað pokana á afgreiðslukassa undir vörur sem hann er að kaupa, eftir að hann er búinn að greiða fyrir þær.

Við höfum í talsverðan tíma selt plastpoka frá Symphony Environmental með sérstöku d2w íblöndunarefni sem gerir það að verkum að pokarnir brotna hratt niður.  Rannsóknir sem Symphony hefur látið framkvæma sýna að plastið brotnar algjörlega niður í CO2 en ekki í örplast.  Því miður hefur ESB ekki framkvæmt rannsóknir til að staðfesta þetta eða sýnt fram á að þessir pokar brotni niður í örplast.  Enda virðist það oft vera hlutverk stjórnvalda frekar að banna hluti en að finna lausnir. 

Þar sem umhverfisvænu plastpokarnir með d2w íblöndunarefninu eru úr plasti þá eru þeir líka bannaðir.  Það eina sem hægt er að gera til að hnekkja þessu banni er að fara í málsókn gegn stjórnvaldi í því landi sem bannar þessa poka.  Það er hins vegar kostnaðarsamt og verður tæplega gert hérlendis nema margir aðilar taki sig saman.  Ég hef heyrt af því að slíkar málsóknir séu í deiglunni erlendis og verður fróðlegt að fylgjast með því.

Nánari upplýsingar um umhverfisvæna plastpoka má finna hér.